TUMBRELLUM, Gall. Tombereau, Instrumentum fuisse volunt inventum ad castigandas mulieres rixosas, quo in aquam dejiciuntur, immerguntur, et inde madidæ et potæ extrahuntur. Cowellus ait esse plaustrum, in quo fornicationis aut adulterii rei contumeliæ causa per civitatem aut burgum circumferuntur. A Gallico Tomber, quod est cadere, volvi, volutari, deducta vox. Ejusmodi vero supplicii infligendi jus, quemadmodum furca et pilorium, altam seu superiorem justitiam spectabat. Pœna Tymboralis dicitur apud Bractonum lib. 3. Tract. 1. cap. 6. § 1. et Tract. 2. cap. 3. § 6. Pœna Tumberelli, in Fleta lib. 2. cap. 1. § 8. cap. 12. § 19. Leges Burgor. Scoticorum cap. 21 :

Si aliquis vel aliqua sit in forisfacto de pane vel cervisia.... pistor ponatur super collistrigium, quod dicitur Pillorie, brasiatrix super Tumbrellum, quod dicitur Castigatorium.

Charta Edwardi I. Reg. Angl. apud Prynneum in Libertat. Angl. tom. 3. pag. 465 :

In tertio transgressu habeant judicium de pillorio vel Tumberello.

Fleta lib. 2. cap. 12. § 29 :

Si pillorium, Tumborale, vel castigatorium de novo levari fecerit.

Henricus V. Rex Angliæ in Charta Fundat. Sheenensis Cœnobii in agro Surregiensi :

In hujusmodi terris, dominiis ac feodis habere possunt pillorium atque Tumbrellum pro punitione malefactorum.

Willelm. Thorn. :

Similiter clamat habere furcas, pilorium, Tumbrellum, etc.

Joan. Britton. in Legib. Angl. pag. 24 :

Et aussi soit de touts ceux que juise de Tomberel ou perte de membre averont suffert par jugement.

Pag. 30 :

Ou juise de pillori ou de Tomberel, ou de aver, vreck de mer, etc.

Adde pag. 31. v. 76. et 135. et Nomolex. Angl. Th. Blount in hac voce. Hinc nostris, Faire le Tomberel, in faciem cadere de aliquo superiori loco. Joan. de Condato MS. :

Car enmi le plus lait chei,

Et fist un si lait Tumberiel,

Qu'il se rompi le hasterel.

Sed et tombereau nostri etiamnum vocant birotum plaustrum quoddam, quod cum deoneratur, omnino resupinum sternitur. Chronicon Flandriæ cap. 8 :

Henri de Maltrait fut mené par les quarefours de Paris en un venel ou Tombereau, et aprés rendu à l'Evesque, et illec mourut en la chambre que l'on dit Oubliette.