TYPARIUM, Sigillum, cui Principis τύπος, seu imago insculpta est. Charta ann. 1124. apud Mabill. tom. 5. Annal. Bened. pag. 668. col. 2 :

Hoc sigillum scribere jussimus per manum Michaëlis nostri notarii, ac plumbea bulla nostri soliti Typarii bullari.

Ubi male editum Typacii. Charta Roberti Comit. Palatini ann. 1171 :

Hoc recordationis præceptum per manus Nicolai nostri curialis notarii scribi, nostrique Typarii impressione insigniri præcepimus.

Charta Willelmi Regis Siciliæ ann. 1177. apud Bromptonum :

Præsens privilegium... bulla aurea nostro Typario impressa, roboratum nostro sigillo jussimus decorari.

Perperam Siipario præferunt Chartæ aliæ Siculæ in Bullario Casinensi tom. 2. pag. 203. Petrus de Vineis lib. 2. Epist. 41 :

Cum in castrorum nostrorum combustione camera nostra cum aureæ bullæ Typario, et regni nostri sigillo perdita et amissa fuerit.

Bulla Aurea Caroli IV. Imp. de electione Imperatoris cap. 27. § 2 :

Duo vel unus sigilla et Typaria Imperialia sive regalia a Cancellario Curiæ recipient.

Occurrit ibi pluries. Joan. Hocsemius in Adolfo a Marka Episc. Leodiensi cap. 30 :

Ostensum fuit in Capitulo coram Magistris sigillum plumbeum sive stanneum, ejusdem Typarii cum magno sigillo argenteo Episcopi, etc.

Adde Corpus diplom. tom. 1. pag. 83. Murator. tom. 7. col. 1021. Miræum tom. 2. pag. 1246. col. 2. Ludewig. tom. 4. Reliq. MSS. pag. 257. etc.