1. VIRTUTES, Angeli, ex secundo Angelicæ hierarchiæ gradu, quorum est ea procurare omnia, quæ ad religionem spectant in communi,

per quos signa et miracula fiunt in mundo

, inquit Rabanus lib. 1. de Univ. cap. 5. et ex eo Papias.

Inest etiam in eo nomine quædam fortitudo, dans efficaciam inferioribus spiritibus ad exequenda divina ministeria

, ait S. Thomas 1. part. q. 108. Isidorus lib. 7. Orig. cap. 5 :

Virtutes, Angelica quædam ministeria perhibentur, per quæ signa et miracula in mundo fiunt, propter quod et Virtutes dicuntur.

S. Hieronymus Epist. 17 :

Denique etiam Josephum..... asserere illo tempore, quo crucifixus est Dominus, ex adytis templi Virtutum cælestium erupisse voces dicentium, etc.

2. VIRTUTES, pro Reliquiis Sanctorum. Formula 174. apud Lindenbrogium :

Et aliud de ista causa in nullo non redebeo, nisi in justo et idoneo sacramento per hunc locum et Deum altissimum, et Virtutes Sancti illius.

Tabularium Carrofense, apud Beslium pag. 156 :

Quo dedicato, cœpit conqueri Imperator cum Domino Apostolico et Duce Rogerio de Virtutibus Sanctorum, etc.

Occurrit rursum infra. Charta Hispanica æræ 905. apud Martinezium in Hist. Pinnatensi lib. 1. cap. 21 :

Ecclesia.... ubi sunt reconditæ Virtutes præfati Apostoli, et B. Andreæ fratris ejus, etc.

Eckehardus Junior de Casib. S. Galli cap. 5 :

Sancti Magni Virtutem quam manibus gerebat, hanc esse adstantibus prædicans asseruit.

Charta ann. 1338. tom. 2. Hist. Dalph. pag. 360 :

Ipsius dom. Dalphini responsione habita accedentibus DD. Canonicis, Capellanis et Clericis dictæ ecclesiæ cum cruce, Virtutibus et paramentis solemniter modo processionis, etc.

3. VIRTUTES, Jura, privilegia. Charta Ludovici Reg. filii Bozonis pro Episcopo Gratianopolit. ann. 894. apud Baluz. tom. 2. Miscell. pag. 156. et Chorier tom. 2. Status polit. Dalph. pag. 19 :

Sancimus ut ipse Ysahac ejusque successores nullo contradicente in predicta ecclesia cum omni ejusdem loci clero teneant, possideant omnes Virtutes quas mater ecclesia perpetim videtur habere in omnibus ecclesiasticis ordinibus, chrisma videlicet in Domini cœna benedicendo, pœnitentiam peccatoribus dando, etc.