BAPHIUM, seu Bafium, locus in quo fucatur vel tingitur purpura. Ugutio : Baphium, genus purpuræ, unde Baphius, vel Baphiarius, purpureus vel textor talis purpuræ, vel venditor, vel mercator hujus purpuræ : et invenitur simpliciter pro mercatore ; et hoc Baphium, locus ubi talis purpura efficitur, vel texitur, vel venditur. Præpositus Baphiis, apud Lamprid. in Alexandro. Procuratores baphiorum varios recenset Notitia imperii sub dispositione Comitis sacrarum largitionum. Bafia Fenicis, in leg. 18. C. Th. de Murilegul. (10, 20). Adde const. 3. de Indulgent. Debit. (11. 28.) et Justin. Cod. const. 2. et 14. de Murileg. (11. 7.) Tirii textrini meminit Firmicus lib. 3. ut et Ammianus lib. 14. qui et Ministros fucandæ purpuræ memorat. Inde Baphii, Ministri in Officina tinctoria constituti, const. 2. C. Just. de Murileg. (11. 7.) ubi alii leg. Baphei ; Baphiarii in Not. Dign. Vide Forcelin.