CONTRATA, Regio, vel tractus, Italis Contrada, Gallis Contrée, Anglis Country, quasi Conterrata, ut quibusdam placet. Acarisius, a Contraho : alii denique a Contado, seu potius a Contea, Comitatus, vocem effictam putant. A Conterrata Murator. Antiq. Ital. tom. 2. col. 1190. Occurrit apud Albertum Argentin. pag. 117. Joan. Hocsemium in Theobaldo a Barro Episc. Leodiensi cap. 32. Sanutum lib. 1. part. 1. cap. 6. lib. 2. part. 2. cap. 2. Petrum de Vineis lib. 2. Epist. 54. lib. 3. Epist. 11. Fridericum II. lib. 2. de Arte venandi cap. 11. 43. Joan. Carmessonium in Vita S. Petri Thomasii cap. 2. in Constit. Siculis lib. 3. tit. 38. etc. Contracta urbis, Regio, Ital. Rione, Pars urbis, Gall. Quartier, apud Ottobonum Scribam in Annal. Genuensibus ad annum 1181. Hac notione passim Annal. Mutinens. Andreas Dandulus in Chronico et alii. Contrada eodem sensu in Chart. Roman. ann. 1151. ap. Pertz. vol. 4. pag. 88. et sæpius.