1. DUODENA, Duodecim viri juratores in indictamentis. Thomas Walsinghamus pag. 276 :

Robertus Trisilian Justitiarius... apud S. Albanum convocari fecit Duodenam, quam pridie averaverat ad indictandum et prodendum malefactores, etc.

Infra :

Tunc Justitiarius convocata seorsum alia Duodena demonstravit eis et nomina et indictamenta personarum per primam Duodenam, etc.

Vide Indictamentum, Jurata.

2. DUODENA, Mensura liquidorum haud magna. Occurrit passim in Chartis Abbatiæ Albiniaci in Biturig. Duodena vasa, in Charta ann. 1303.

3. DUODENA. Una ex Horis seu liturgiis Ecclesiasticis, quam alii Duodecimam vocant. Vita S. Rusticulæ Abbatissæ Arelat. cap. 31 :

Vesperam cum filiabus ex more decantans, adjuncta etiam Duodena valde se corpore jam fatigari sentiens, etc.

Mabillonius sæc. 2. SS. Benedict. pag. 146. intelligit Completorium. Hunc si tanti est consule.]

4. DUODENA, Duodecim, Gall. Douzaine.

Quinquaginta Duodenæ cordarum pro sagittis

, apud Rymerum tom. 5. pag. 245. col. 2 :

Cum quatuor Duodenis utruum, duabus Duodenis arcuum, sex Duodenis cathapultarum, et quatuor Duodenis cornuum,

apud eumdem tom. 8. pag. 684. col. 1. Occurrit etiam apud Baluz. tom. 2. Hist. Arvern. pag. 783.

5. DUODENA, Duodenaria, Oblatio duodecim denariorum et ultra, quam percipere consueverant Curati primitivi in Ecclesiis et Capellis intra suæ parochiæ limites erectis. Tabularium S. Clodoaldi Charta 8 :

Recepimus in numerata pecunia decem libras Parisienses..... pro jure oblationum et Duodenarum, quod exigebamus et dicebamus nos habere in parochia de Garchiis prædicta, quam quidem summam pecunie tenemur et promittimus implicare et ponere in utilitatem prædicti S. Clodoaldi.

Ibidem Ch. 14 :

Dicit etiam talem esse consuetudinem, quod si oblatio in eadem Capella et in alia Ecclesia similiter sit xii. denariorum et amplius, totum esse Canonicorum, excepto uno denario, quod habet Sacerdos qui cantat Missam... Sed si minus offerretur in cappella xii. denar. totum esset Capicerii jure parochiæ suæ.

Statutum ejusdem Capituli ann. 1255 :

Statutum etiam fuit dicta die inter eos quod pecunia ratione Duodenæ proveniens, quæ consuevit Quadragesimali tempore distribui, Dominica qua cantatur,

Invocavit me, sit de cætero distribuenda. Ibidem Instrum. anni 1301 :

Jus ipsorum Canonicorum diminuit, non recipiendo oblationes, donando de eis et faciendo, quominus perveniretur ad numerum Duodene.

6. DUODENA, Certæ jurisdictionis districtus, territorium certis limitibus circumscriptum. Mandat. Franc. card. thesaur. eccl. Laudun. ann. 1309. in Reg. 65. bis Chartoph. reg. ch. 156 :

Legitimis filiis, tam illorum, qui de Duodena vulgariter appellantur, quam aliorum hominum thesaurariæ prædictæ, etc.

7. DUODENA, Præstatio duodecim denariorum, forte ob tutelam domino exsolvenda. Charta Phil. milit. dom. de Cauleincort ann. 1217. ex Tabul. abbat. Ham. :

Pronuntiaverunt quod prædicti hospites ecclesiæ memoratæ michi et hæredibus meis annuatim in festo S. Remigii suam amodo tenebuntur persolvere Duodenam ; ita quod unusquisque hospitum duodecim denarios persolvet : et ego vel hæredes mei nullam in districto vel hospitibus justiciam habebimus, nec in hospitibus nec districto aliquid capere poterimus ; et nos propter eandem debemus mittere Duodenam..... Si vero aliquos ortos vacare contigerit, quamdiu vacabunt, in manu ecclesiæ dictæ erunt, quæ quamdiu eos tenebit, Duodenam inde aliquam non persolvet.... Qui vero plures ortos tenuerit, de singulis tenebitur persolvere Duodenam.

Charta Caroli regent. ann. 1358. ex Bibl. reg. :

Item Duodenam regiam de Villerel, quæ valet circiter triginta solidos annuatim.

8. DUODENA, Quod ratione duodecim denariorum ad libram corollarii vice in locationibus datur. Stat. MSS. eccl. S. Petri Insul. ann. 1388 :

Item statuimus antiquam consuetudinem ecclesiæ nostræ declarando, quod nullus canonicus ecclesiæ nostræ habeat vel percipiat Duodenas, quæ præsentibus et residentibus canonicis pro acensatione decimarum nostrarum consueverunt dari et distribui, nisi sint in sacris ordinibus constituti.