1. INQUISITIO, Tributum, exactio publica, Quæsta, vel quod ab Inquisitoribus indicebatur et exigebatur, uti infra observamus. Leovigildus Cordubensis Presbyter. lib. de Habitu Clericorum :

Quem Inquisitio, vel census, vel vectigalis, quod omni lunari mense Christi nomine solvere cogitur, retinuerit, etc.

Conventus Ticinensis ann. 853. post Concilium Ticinense sub Leone IV. can. 2 :

Concedimus abhinc in futurum altas super eos fieri Inquisitiones, nisi unde Caroli proavi et avi nostri tempore factæ fuerunt.

Egica Rex in Concilio Tolet. XVI. :

Ut nemo Episcoporum pro Regiis Inquisitionibus exhibendis, parochialium Ecclesiarum jura contingat, nec quascunque exinde Inquisitiones, aut evectiones exigere audeat ; sed de prædiis suarum sedium Regio culmini solita perquisitionum obsequia deferat.

Adde can. 6. Census Inquisitionem, dixit lex 5. Cod. Theod. de Censu. (13, 10.)

2. INQUISITIO, Lis, causa ; unde Inquirere, Litem instruere. Lit. ann. 1079. tom. 4. Ordinat. reg. Franc. pag. 48 :

Et ne passim Inquirat curia nostra dicti loci, dicimus quod de verbis injuriosis nulla fiat Inquisitio, nisi in præsentia curiæ nostræ pro tribunali sedentis dicta fuerint.