◊ Scribit Spelmannus Letam Anglo-Normannis visum franci plegii appellari, quod conscribi hic soleant liberiores villæ, seu designatæ stationis, homines, pacis regiæ fidejussores. Est perinde, subdit ille, hæc Curia prisca quæ inter Saxones ad Friborgos, Decanias, Tenmentalas pertinebat, et cognoscit, non de læsa Majestate, sed de aliis omnibus transgressionibus et delictis contra pacem regiam, regiam dignitatem, et bonum publicum, et statuta plurima infra præscriptam contingentibus dictionem. Animadvertit tamen non in hæc omnia, sed propemodum in leviora : gravioribus, utpote feloniis, etc. ad Justitiarios Assisarum e Statuto ann. 1. Edw. III. relegatis. Abbr. Placit. pag. 291. ann. 22. Edw. 1. Norf. rot. 2 :

Et quia predicta transgressio (scilicet præstacio faldæ apud Burnham) magis sonat injuria senescalli quam injuria eorum qui fuerunt præsentatores, nec præsentacio in Leta alicujus facta, est fundamentum judicii, eo quod illi super quos præsentacio facta fuerit, habent responsionem suam ad ea quæ super eos præsentata sunt, etc.

◊ Quando autem et quo auctore facta sit hæc Letarum distributio, incertum est, nisi referatur ad Alvredum qui friborgas, id est, francos plegios, de quibus hæc Curia cognoscit, instituebat, licet Letæ, aut visus franci plegii, vocabula in Anglo-Saxonum, vel Anglo-Normannorum Principum tabulis minime deprehendantur : sed discretis appellationibus concedi inter privilegia,

Grithbrich, Fithwite, Bloodwit, Hamsoke, Forstall, Weif, Stray

, et plurima hujusmodi, quæ collective sub Letæ nomine continentur. De vocis etymo nihil certi traditur a Spelmanno et Somnero, qui, ut, solent, a Soxonico deducunt. Hos consule, si lubet : nam cum res perspicua non sit, eorum sententiis recensendis tædet immorari.

◊ Leta interdum sumitur pro emendis, seu mulctis quæ in letarum judiciis irrogantur. Charta Ricardi II. Regis Angl. tom. 1. Monast. Angl. pag. 538 :

Terras, tenementa, redditus, Letas, servitia, feoda Militum, etc.

Et pag. 576 :

Cum wardis, maritagiis, releviis, escaetis, curiis, lestis, (leg. Letis) hundredis, etc.

Alia tom. 2. pag. 275 :

Et de omnibus amerciamentis... tam pistorum, braciatorum, quam cæterorum... quæ eidem Rogero vel hæredibus suis qualitercunque, in quocunque defectu in Leta ejusdem villæ..... competere seu pervenire potuerunt.

A leta forte hoc significatu Provinciales nostri hausere suum late, pro ea emenda pecuniaria quæ debetur pro contestatione.