Abatare se, Bona decoquere, mensarias rationes mala fide creditoribus renuntiare. Vox ita confecta ab Hispanis, quibus Abartise, est se dejicere ; quia decoctores ita bona sua seu aliena decoquunt, ut quasi prostrati jaceant, nec erigere se ulterius valeant : quibus opponuntur ii qui stant, qui nempe eo sunt in statu, ut creditoribus facere satis possint. Sic apud Latinos mergi ære alieno dicuntur, qui vix emergere possunt. Libertates concessæ Barcinonensibus a Petro Rege Aragonum ann. 1285. MSS :

Quicumque tenens officium vel ministerium, qui emerit aliquam mercaturam ad opus officii vel ministerii sui, sive sit mercator, sive alius, qui se Abatat, capiatur in persona, sicut caperetur pro commanda, nisi ostendere potuerit, quod casu fortuito amiserit eam.

Legitur hoc capitulum apud Capmany Memorias Histor. tom. 4. pag. 221. ubi pro anno 1285. est 1283. Secunda Curia Generalis celebrata Barcinone ann. 1299 a Jacobo II, Rege Aragon. MS. :

Item quod quilibet Campsor, qui se Abatat, vel qui jam steterit, vel sit Abatut, quod nunquam teneat tabulam cambii, nec aliquod officium nostrum ; sed quod habeatur et præconizetur pro infami et pro Abatuto per civitatem, et per locum ubi usus fuerit officio : et quod detineatur captus, quousque satisfecerit, et quod non comedat nisi panem et aquam.

Curia Generalis Catalaniæ sub Alphonso Rege Arag. ann. 1333. MS. :

Ordinamus quod quicumque mercator vel draperius et eorum negotiatores seu factores tenuerint commandas alterius, vel merces, aut alias res quas receperint è s' Abatran, aufugiendo, vel se absentando, puniantur, etc.

Vox Catalana est abatrerse, se dejicere, creditoribus decoquere, foro cedere, cujus tempus futur. tertia plur. persona est s'abatran quam sæpius in latinis regum Catalaniæ diplomatibus obviam habuimus, ita in privil. Jacobi II. pro regno Valentiæ ann. 1322. in Aureo opere privilegiorum, etc. fol. 68. v°. legitur :

aliqui ex dictis curritoribus se absentaverint vel se Abatran nec poterint solvere et restituere quod eis commendatum fuerit.

Eodem sensu apud mercatores francogallicos in Asia minore dicebatur Abatellement, de qua voce vide Merlinum in Diction. jur.

Abbatiderit. Pactus Legis Salicæ tit. 45. Si quis hominem de barco Abbatiderit, id est, amoverit, dejecerit.