ABBREVIATOR, Officii nomen in Cancellaria Apostolica. Abbreviatores septuaginta duo numerantur, e quibus duodecim sunt de parco majori, et Prælatorum more vestibus utuntur violaceis. His Libellos supplices distribuit Cancellariæ Præfectus, tumque per se aut substitutos Bullarum exscribunt minutas seu primas perscriptiones, quæ ad Libelli supplicis calcem summatim collectæ habentur ; et inde vocis etymon. Viginti duo Abbreviatores dicuntur de parco minori, quorum est, instrumenta, quibus contrahi permittitur in gradu prohibito, perscribere et in commentarios referre. Ceteri Examinatores appellantur, quod eorum officii sit Bullas ad exemplar conferre et recognoscere. Et hi Laici esse possunt et uxores ducere. Statuta Capitulorum Generalium S. Victoris Massiliensis :

Testes fuerunt præsentes.... Magister Ricardus de Cabaniis Abbreviator et grossator Domini Papæ.

Collect. Concil. Hispan. tom. 3. pag. 650 :

Ego Antonius de Campis Literarum Apostolicarum Abbreviator, scriptor et registrator publicus, Apostolica et imperiali auctoritate notarius etc.

Macri Hierolexicon. Vide in voce Brevis. Apud Hofman. unum sunt Abbreviator et Protonotarius.