Abonnati, Dicuntur dominorum feudalium subditi, quorum præstationes ex condicto, pacto, vel privilegio moderatæ aut ad certam ac definitam pecuniæ, aut alterius rei solutionem sunt limitatæ, ita ut talliis, ac ceteris servitiis non sint obnoxii ; quemadmodum sunt homines de corpore, vel servi, quibus pro libito tallias ac onera domini imponunt. Vox conficta ex Bonna, terminus, limes ; nam ut agri certis limitibus definiuntur, ita ejusmodi Abonnatorum præstationes suis finibus, limitibus, ac conditionibus constant, quas domini servare tenentur. Hinc passim in Consuetudinibus nostris municipalibus

hommes et serfs Abonnez, musniers Abonnez, taille Abonnée, loyaux aides, devoirs, roncins de services Abonnez, etc

. Charta ann. 1298 :

Ipsum Hugonem et Benevenutam de Tiseio ejus uxorem Abonnamus, et liberos esse volumus... ab omni tallia, corveia, questa, et ab omni alio genere et onere servitutis,... pro 4 libris ceræ dicto Priori... in festo S. Remigii annis singulis persolvendis

. Arestum anni 1310 :

In modum qui sequitur extitit ordinatum. Videlicet quod homines Aconnati de S. Desiderio et de aliis locis pertinentibus ad dictum dominum de S. Desiderio, commorantes apud Catalaunum, qui non sunt de tallia, nec de manu mortua, etc.

Charta Savarici Vicecomitis Thoarcensis ann. 1269 :

Cest establissement est entendu des rachats qui estoient à mercy : car cil qui sont Aconi, demeurent en leur estat.

Charta Libertatis incolarum Crevenni ann. 1280. ex Archivo Capituli Autissiodorensis :

Item tailliam quam habebamus super homines dictæ villæ altæ et bassæ de termino in terminum temperamus, Abonamus et limitamus in modum inferius annotatum.

Addo integram Abonamenti Chartam ex Tabulario S. Benigni Divion. :

In nomine Domini Amen. Anno Incarnationis Ejusdem mcclxiii. mense Februario. Ego Odenetus de Yserio notum facio omnibus præsentes Litteras inspecturis, quod cum vir venerabilis et dominus meus Richardus Abbas Ecclesiæ S. Benigni Dyvionensis Abonaverit me ad triginta solidos monetæ Viennensis nomine talliæ annuatim quamdiu ei placuerit, me in manu sua retinendo, ita quod nec Major, nec aliquis alius super me potestatem vel jurisdictionem aliquam habebat, salva tamen eidem domino Abbati justitia sua in me, promitto et teneor dictos triginta solidos dictæ monetæ reddere ei, vel ejus mandato annuatim ad festum S. Remigii nomine talliæ quamdiu ei placuerit Abonamentum tenere prædictum. In cujus rei testimonium præsentibus Litteris sigillum viri venerabilis et Religiosi Domini Amidei Abbatis S. Stephani Dyvionensis rogavi et feci apponi. Actum anno et mense prædictis.