ABSUMMA. Sic lego pro Absma, cum nota abbreviationis, in Charta ann. 1341. ex Reg. 72. Chartoph. reg. ch. 369. quod si bene est, interpretor Summæ collectionem, Gall. Total. Vide infra Assummare :

Item et quod dictus Gillus commissarius præfatusque Johannes Roussel non invenerant aliquem, qui vellet dare amplius aliquid in prædictis vinea et nemore et torculari munito venalia expositis, cum essent quasi in Absumma redacta ultra sexaginta libras, quas idem magister Johannes Amelii obtulerat in eisdem.... Torcular munitum, nemus, vineam cum columberio superius confrontata, et quasi in Absumma redacta, pretio videlicet dictarum sexaginta librarum,.... supplicavit dominis fundalibus dictorum locorum, ut de ipsis venditis ipsum emptorem investiant.

Nisi per in Absumma redacta, intelligas Inculta, ruinosa, et caduca. Vide in Absus.