ACCAPTAMENTUM, Stips, eleemosyna quæ corrogando colligitur, eadem notione ac Quæsta, Gall. Quête. Vide infra Accattator. Statuta sabater. Carcass. an. 1402. tom. 8. Ordinat. reg. Franc. pag. 563. art. 15 :

Quod si.... contingerit aliquem vel aliquos dicti ministerii.... mori, ... qui esset vel essent ita pauperes, quod non haberent bona ex quibus possent sepeliri ; .... eo casu suprapositi dicti ministerii.... teneantur tales sic deffunctos ecclesiasticæ sepulturæ tradi facere, .... sine questu seu Accaptamento pro tali mortuo faciendo quovismodo.

Vim vocis explicat art. seq. pag. 564 :

Sine questu et helemosina pettenda pro sepultura illius deffuncti.

Alia notione, vide in Accaptare.