ADMISSIONALES, Qui introducendis ad Imperatorem hominibus præfecti sunt : seu, quibus

in palatio admittendi, vel salutandi officia creduntur

, ut ait Jul. Firmicus lib. 4. Matth. cap. 14.

Qui Admissionibus præsunt

, ut vetus Interpres Juvenalis Sat. 4 ; ὁ ἐπὶ τῶν εἰσαγωγῶν, apud Pachymerem lib. 6. Hist. cap. 26. Lampridius ait de Alexandro Imp. quod

salutaretur quasi unus de Senatoribus, patente velo, Admissionalibus remotis

. Quod vero ad vela et cancellos starent,

Admissionales cancellarii

appellantur in Notitia Imperii, ut quidam volunt, tametsi Edita Admissiones cancellarii præferat, ita ut diversa fuerint officia. Horum munus

officium Admissionis

dicitur Suetonio in Vespas. cap. 14. aut

officium Admissionum

in leg. 11. Cod. de Privil. eor. qui in sacro Palat. milit. et in Notit. Imp. et

officium Admissionalium

, in l. ult. cap. de Divers. offic. Nam plures erant, eorumque partita erant munia, ita ut alii aliis in causis ac negotiis ad Principem admitterent, ut ille Homilus dicitur

legationum Admissionalis

, apud Herennium Philonem in legat. ad Caium. Primus autem Admissionalium

Magister Admissionum

, Vopisco in Aureliano, et Ammiano lib. 15. huic qui proxima erat dignitate.

Proximus Admissionum

, eidem Ammiano lib. 22. dicuntur. Sed de Admissionibus et Admissionalibus, multa jam ante congessere Theodorus Marcilius, Pancirollus, Savaro, Henricus Valesius, Salmasius, Jacobus Gothofredus, et alii.