1. ÆQUIVOCUS, ὁμώνυμος, Homonymus, in Vita Ludovici Pii ann. 837. Qui eodem nomine appellatur. Flodoard. lib. 2. Hist. Rem. cap. 20 :

Ludovicus ab Æquivoco suo restitutus est in regnum.

Charta Hermengardæ Reginæ Burgundiæ ann. 1037. in Tabulario Ecclesiæ Gratianop. sub Hugone Episcopo fol. 33 :

Quia istam domum duo homines Æquivoci, id est, qui uno nomine vocantur, id est, Ebo, possident.

Guntherus lib. 1. Ligurini :

Alter at Æquivocum sibi consimilemque Rogerum

Progenuit.

Henric. Rosla in Herlingsberga, de 4. Henricis Impp. :

Quatuor Æquivocum sibimet qui nomen habebant.

Occurrit passim. Hinc

2. ÆQUIVOCUS. Atto Episc. in Capitulari cap. 48. ubi Clerici vetantur auguria exquirere :

Si quis post hanc cognitionem, Ecclesiasticam contemnens doctrinam, ad... Prophetas, aut Angelos, vel aliquos Sanctorum defunctorum, quos Æquivocos falso vocant, abierit, eorumque pravis doctrinis inhæserit, anathema sit.