AGONOTHETA, pro Agonista, bellator. Ugutio : Agonitheta, qui vel quæ est in agone, i. pugil. Vita S. Ermelandi Abb. MS. :

Omnibus mundi spretis pompis, cæterorum commilitonum vallatus præsidio, Agoniteta virilis, omnium virtutum consectans iter.

Vita S. Castrensis Episcop. n. 1 :

Hoc modo conati sunt gloriosos Agonothetas Christi a cultu divinæ legis evertere.

Occurrit præterea in libello de Miraculis S. Quintini in Insula cap. 2. apud Hemereum, apud Odericum Vitalem lib. 7. pag. 642. lib. 8. pag. 669. in Vita S. Vunebaldi cap. 5. apud Adenulphum Archiepisc. Capuanum in Vita S. Marci Galilei Atinensis Episcopi, etc. Alias in Gloss. Lat. Græc. ἀγωνοθέτης, dicitur Munerarius, de qua voce multa habet P. Faber lib. 1. Agonist. cap. 18. Dig. lib. 50. tit. 4. fr. 18. § 17. Theod. Cod. lib. 15. tit. 9. l. 2. Vide Agonizeta.