ALÇARE, Provocare, appellare, in jus vocare ; item versus aliquem se recipere. Vox Hispanica ab Alçar, Erigere, attollere : hinc Alçadas vox fori Hispanici, quæ certas appellationes designat in causis Clericorum, sed maxime pauperum, qui præ inopia ad supremas curias non possunt appellare. Hujusmodi appellationum Judices Episcopi. Jacobus I. Rex Arag. in Foris Oscæ, ann. 1247. fol. 5 :

Decet dare bonam et sufficientem fidantiam, quod teneat ipsum pignus de manifesto, et quod non se Alcet cum illo pignore.

Fol. 9 :

Clericus pro debito aliquo, quod debeat Laico, nullo modo potest se Alçare ad Episcopum ; sed pro tota alia causa, quæ pertineat ad Ecclesiam, aut ad ordinem suum, bene potest se Alçare ad Episcopum.

Observantiæ Regni Aragon. lib. 2. tit. Ne Vir. § 22 :

Si clericus dicat coram Judice sæculari, quod est in possessione alicujus rei, non potest se Alçare ad suum judicem, ad probandam suam professionem, etc.

Alçar-se Castil. Catal. et Lusitan. olim erat Ad alium judicem provocare, appellare, et de omni judiciorum genere dicebatur ; inde Alça, Hisp. Alzada, Provocatio ad alium judicem. Charta Sanctii II Reg. Port. apud S. Rosa de Viterbo tom. 1. pag. 72 :

Et pro directis suis declaratis non fiat Alça ad dominum Regem.