ALLUX. Gloss. Isid. Allex, pollex in pede. Festus : Allex, pollex, scandens proximum digitum : quod velut insiliisse in alium videatur. Ita quidem veteres : at posteriores Allux dixerunt. Ebrard. Bethuniensis in Græcismo :

Est manuum pollex, sed dicatur pedum Allux.

Onomasticum : Hallux, ἀντίχειρ. S. Althelmus lib. 1. de Virg. cap. 42 :

Dum linis olei liquore delibutis digitorum articulos et palmarum pollices obvolverent, simulque pedum Alloces truciter adnecterent.

Ascriptum in MS. Alloces esse digitos in pedibus crassiores. Vox ducta videtur ab ἅλλομαι, Salio, ac proinde scribenda cum aspiratione.