AMISCERE, Amisere, Ammiscere, Præstatio ex rebus escariis, vel etiam idem quod Procuratio, pastus. Charta ann. 957. apud Murator. tom. 3. Antiq. Ital. med. ævi col. 719 :

Aliud nichil (facere debemus) nisi tantum Amiscere de piscibus bonis, quatuor vices in anno.

Infra :

Debemus... quatuor vices in anno, secundum vestrum honorem, ut melius potuerimus, de piscibus valde bonis in vestrum servitium adducere.

Charta ann. 1116. ibid. tom. 4. col. 59 :

Dent porcum, et multonem tercium et quartum, et spallam, et Amisere, et plaustrum lignorum pro unoquoque jugere, pro albergaria unum sextarium vini, etc.

Alia ann. 1186. col. 855 :

Cum omni honore et districtu, et conditionibus, comandasiri, Amisceribus, et ecclesiarum advocatiis, etc.

Charta Ottonis III. ann. 1210 :

De nostra benignitate concessimus alienationes sive invasiones factas ab aliquo suorum parentum, contra formam feudi, de... teloneis, pedagiis, curadiis, præclariis, Amisceribus, etc.

Charta ann. 1221. tom. 1. Hist. Cassin. pag. 318. col. 1 :

Guillelmus de Venano debet... unum Ammiscere de carne et sex panes ; Accolino Marino in nativitate unum Ammiscere de carne et sex panes.

Lib. censual. 13. aut 14. sæculi laudatus a Cl. V. Garamp. in not. ad Hist. B. Chiaræ pag. 213 :

Nota, quod ensenia dicuntur Ammisera, et unumquodque Ammisere debet esse de decem panibus et triginta ovis pro una casata.