« »
 
[]« Baccalaria » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 509b. http://ducange.enc.sorbonne.fr/BACCALARIA
BACCALARIA, Prædii rustici species, eadem forte quæ Vasseleria, seu feudum Vasalli inferioris, ut Cangius ipse explicat in Vasseleria, post vocem Vassus. Tabular. Celsinianense :
Dono etiam Baccalariam quæ est in ipsa villa cum [] campis et vineis et pratis, et omnibus, quæ ad ipsum alodum pertinent.
Tabularium Bellilocense in Lemovicibus Charta 13. quæ est anni 882 :
Ecclesiam nostram... quæ constructa est in honorem S. Martialis, cum curte et orto, et exitu, et viridario, et cum ipsa Baccalaria integra, quæ ibidem pertinet.
Charta 34 :
Cedimus etiam casam nostram dominicariam, cum ipsa Baccalaria, cum pratis, silvis, etc.
Charta 89 :
Baccalariam meam de Camayraco dimitto Deo et S. Petro post mortem meam ad integrum, etc.
Occurrit passim nude in hoc Tabulario ch. 102. 132. 143. 162. etc. et in Tabulario Conchensis Abbatiæ in Ruthenis Ch. 409. 500.
Baccalaria Dominicaria, Indominicata, Prædium rusticum quod ad dominum ipsum spectabat, et ab ipso excolebatur. Idem tabular. Bellilocense Charta 58 :
In eodem loco Baccalaria Indominicaria.
Testam. S. Geraldi Auriliacensis Comitis apud Duchesn. in Notis ad ejusd. Sancti Vitam :
Et medietatem de ipsa curte, et ipsum castellum cum Baccalaria Dominicaria, et duos mansos, etc.
Donatio Godefridi Comitis Cadurcensis circa tempora Caroli Calvi :
Hoc est curtem meam indominicatam, quæ vocatur Igeracus, cum Ecclesia in honore S. Martini constructa, et Baccalariis Indominicatis.
Ita Dominicus. At Tabularium Bellilocense Ch. 3. habet tantum, et Bacchalariis et mansis servilibus. Idem Tabular. Ch. 34 :
Hoc est capella nostra indominicata, quæ est fundata in honorem S. Petri, cum ipsa Baccalaria Indominicata, cum ipso prato, et cum ipso brolio indominicato, etc.
Baccalariæ pluribus constabant mansis, mansus autem erat 12. jugerum, ut auctor est Papias. Idem Tabular. Belliloc. Ch. 34 :
Et alium mansum ubi Ainardus visus est manere, ipsa Capella, cum ipsa Baccalaria et cum ipsis mansis.
Charta 47 :
Ecclesiam nostram in honore S. Juliani Martyris, cum ipsa Baccalaria et mansis ad ipsam pertinentibus.
Interdum decem mansos continuit Baccalaria. Bernardus Guido de Ordine Grandimontensi :
Turpio (Episcopus Lemovicensis) dedit eis Baccalariam, quæ decem mansos tunc continebat.
Turpionis ipsius verba recitat Dominicus :
Do illis villam quæ vocatur Baccalaria, quæ decem in se Mansos continere videbatur.
Hac voce Lusitani etiam usi sunt. Vide Sa Rosa de Viterbo vol. 1. pag. 165.
Baccalaria Facere, Baccalariorum opus exercere. Tabularium Bellilocense Charta 95. cui titulus est, Breve de exemptis :
In illis rusticis, ubi quærere solent opera, habent unam diem cum bovibus, de illis hominibus qui boves habuerint, quandiu Baccalaria Fecerint, et non si bacalia, aut judicium firmaverint cum aliquo, si propter hoc redemptionem dederint, non habeat partem Vicarius, nec judex : si sacramentum firmaverint cum lege, et redemptionem dederint, tertiam partem illis reddant.
© École des chartes.