BEMOLLIS, Una e clavibus, uti vocant, Musicæ ; vulgo Bemol, cui opponitur bedurum, seu B. quadratum. Joann. Brompton. in Henric. II. :

Hibernici in duobus musici generis instrumentis quamvis præcipitem et velocem, suavem tamen et jucundam... efficiunt Musicam. A Bemolli incipiunt, et sub obtuso grossioris cordæ sonitu, latenter ludentes, in idem redeunt.

Ubi Silvester Giraldus in Topogr. Hibern. dist. 3. cap. 11 :

Semper tamen a molli incipiunt, et in idem redeunt, ut cuncta sub jucundæ sonoritatis dulcedine compleantur.

Idem Giraldus in itiner. Cambriæ cap. 13 :

Quot videas capita, tot audias carmina discriminaque vocum, varia in unam denique sub B. mollis dulcedine blanda consonantiam et organicam convenientia melodiam.