BENENATI, Εὐγενεῖς Εὐγαγονότες, Zonaræ in Alexio, Ingenui, viri nobiles, Italis Ben nati. Vetus Interpres Juvenalis sat. 11 :

Ingenui vultus, Modesti, Benenati.

Messianus lib. 2. Vitæ S. Cæsarii Arelat. Archiep. :

Si crastino panis defuerit, omnes jejunemus, dummodo hodie Benenati homines seu reliqui captivi nobis euntibus et bibentibus non eant per plateas mendicare.

Eckehardus junior de Casib. S. Galli cap. 2. :

Iso quidem non solum Benenatorum, sed et sanctorum filius fuit parentum.

Cap. 16 :

Insiliensque in hominem Bene quidem natum, sed et admodum litteratum, grandem ei manu alapam dedit.

Ennodius lib. 3. Ep. 16 :

Et perlatorem Benenatum hominem propter fugaces suos venientem commendo.

Ep. 17 :

Benenatum hominem Gallias pro certis negotiis expetentem.

Charta Lusitan. æræ 1067. apud Rodericum da Cunha in Episc. Portensibus 1. parte :

Et aliorum multorum filii omnium Benenatorum quæ erant in Palencia, etc.

Cæsarius lib. 1. cap. 12 :

Adolescens Benenatus et divitum filius.

Utitur et lib. 4. cap. 4. 22. lib. 9. cap. 48. lib. 10. cap. 54. ut et Guillelmus Abb. S. Theodorici in vita S. Bernardi lib. 1. cap. 3. Justinian. Nov. 22. de Nupt. cap. 8. et Nov. 78. Auctor Vitæ S. Hadelogæ Virg. cap. 2. n. 9. Marsilius Patavinus in Defensore pacis 1. part. cap. 16. pag. 80. etc. Homines boni generis dicuntur in Capitul. Caroli M. ex Lege Salica Romana et Gombata Aquens. ann. 813. cap. 12. Pectora Benenata, apud Flaccum lib. 4. Od. 4. id est, generosa, ingenua : contra, male nati, servile genus apud eumdem lib. 2. Epist. :

Gratus Alexandro Regi Magno fuit ille

Cherilus, incultis qui versibus et male natis

Retulit acceptos regale numisma Philippos.