BILLIO, Gall. Billon, Hispanis Vellon, Nummus æreus, vel ex ære et argento conflatus : interdum massa monetaria. Statut. Philippi Pulcri regis Franc. ann. 1305. in Reg. 36. Tabul. Regii :

Ne quis aurum, argentum, vel Billionem extra regnum nostrum deferre præsumat.

Charta ejusdem Regis ann. 1295. tom. 1. Ordinat. Regum Francor. pag. 326. in Notis col. 2 :

Contractus auri, argenti in massa, vel Billionis, aut alterius metalli.

Occurrit ibid. pag. 451. 529. 814. Molinæo in Tract. de Contract. quæst. 100. n. 783. et Covarruviæ de Vet. numismat. collat. cap. 1. n. 1. moneta de Vellon, seu de Billon, dicitur non tantum ea quæ ex ære percuditur, admista parte aliqua argenti ; sed et illa quæ cuditur ex argento, cui mista sit tertia vel quarta aut sane quinta pars æris. Neu brissensis vocem Vellon, et Billon a vilis deducit, ita ut vilior moneta intelligatur. Malim sic dictum aurum vel argentum in massam seu Billam, i. e. baculum, conflatum, necdum purgatum. Vide Billus.