BIXANINUM, Bixellum, Bixetum, Voces unius ejusdemque notionis, quam nobis suppeditat Murator. tom. 2. Antiq. Ital. med. ævi col. 897. ad Stat. Mutin. ann. 1327 :

Nullus, qui sit scriptus in arte Bixellorum, audeat immiscere aliquod pilum de bove, vel de capra, vel de asina, vel de yrco, de capreto, vel de cane, etc.

Est autem, inquit ille, Bixellum, nunc Bisello, genus panni vulgaris, e crasso filo contexti, et præcipue in Mutinensium montibus usitati. Charta ann. 1281. ibid. col. 901 :

Item de soma pannorum de colore laboratorum citra montes, exceptis Bixaninis... Item de soma lanæ citramontanæ grossæ : de soma Bixetorum, etc.

Stat. Ferrar. ann. 1279. apud Cl. V. Garamp. in Ind. ad Hist. B. Chiaræ pag. 501 :

De vestito Bixelli, id est, mezzalanæ, etc.

Vide Birrus.