BLAVOTINI, Bloetini, Militaris factio in castris Flandriæ Comitis, Philippo Augusto regnante. Rigordus ann. 1213. Bloetinos vocat, ut et Willelmus Armoricus lib. 2. et 9. Philippidos, qui videtur innuere gentem fuisse hac appellatione, eam Flandriæ partem, quæ Furnas spectat, incolentem, ubi Ysangrinos collocat :

Inde movens iterum, classis legit æquoris undas,

Quod Bloetinorum candentia littora lambit,

Quaque marescosos extendit Flandria campos,

Et qua bellipotens media inter prælia terram

Sulcat Ysangrinus, gladio munitus et hasta,

Qua sola Furnus arat finibus vicina marinis.

Et lib. 9 :

Jam sua per speculas Bloetinus signa levavit,

Omnis Ysangrinus, Furnites, Belga sub uno

Cœtu, Ferrando Comiti se consociarunt.

Versus Furnas illos pariter statuit Lam bertus Ardensis pag. 258. dum enarrat bellum a Mathilde Lusitana Philippi Comitis Flandriæ vidua Furnensibus illatum :

Eo maxime quod Blavotinos nunquam domare vel subjugare potuit.

Alio loco, bellica virtute, et animi magnitudine præstitisse Blavotinos scripsit :

Aliique parentes ejus amici, utpote viri fortes, ausim dicere Blavotinorum patres et auctores.

Vide Chronicon Andrense ann. 1281. Meierus ann. 1206. et Malbrancus lib. 11. de Morinis cap. 7. a Blavotorum familia appellatos volunt. Certe in Charta Philippi Alsatii Flandriæ Comitis ann. 1181. apud Miræum in Diplom. Belg. lib. 2. cap. 44 :

Riquardus Blavoet de Furnis

subscribit.