BURGWARDUS, Burgwardium, quibusdam, Castellania, Burgi territorium, ager, dicitur ; ex Teutonico Burg, Burgum, et Ward, custodia. Sed ex locis, quos hic describimus, villa dicitur et munitio, scilicet quæ Burgis adjacet, et quæ inde nostris Boulvard, pro Bourgward vocatur, unde et ipsi oppido, et agro circumjacenti nomen postea attributum. Nam quod Salmasius vocem a βῶλος, cespes, deducit, nihili est. Charta Ottonis M. Imp. ann. 965. pro Ecclesia Magdeburg. apud Meibomium :

Munitionem etiam, vel Burgwardium urbis Spuitineburg in pago Nudhice sitæ, cum omnibus pertinentiis, taleque prædium, quale Huodo in beneficio habet in pago, etc.

Adde Heinric. III. Imper. chart. ann. 1045. ap. Hoefer. Diar. rei Diplom. vol. 2. pag. 525. Historia erectionis Archiepiscopatus Magdeburgensis per Joannem PP. in Concilio Ravennat. :

Cum omnibus pertinentiis, et villis, quas Burgwart vocant.

Ditmarus l. 6. pag. 59 :

Merseburgense Burgwardum.

Lib. 6. pag. 72 :

Insuper Zurbizi Burgwardum, quem antecessores sui in beneficium possederunt sibi vendicavit.

Lib. 7. pag. 97 :

Ut parochiam in Orientali parte Mildæ fluminis jacentem, i. e. in Burgwardis Bichni et Wtein Eilbardo concederem.

Infra :

Ekkiardus... in Burgwardo suimet Rochelizi dicto 2. munitiones ad capiendas ibidem feras... parat.

Pertzio vol. Script. 3. pag. 803. 821. 853. et 867.