2. CAMERA, Domus, cubiculum, cœnaculum, conclavis, Gall. Chambre. Papias : Camera a curvitate dicta, est enim volumen introrsum respiciens. Item : Camera, quia Camura, i. curva, dicitur lapidea domus. Iso Magister in Glossis : Camiron, Græce Curvum, inde Camerata domus, cujus testudo curva est : inde Camelum, animal tortuosum. Chronicon Trivetti ad ann. 1277. Spicileg. Acher. tom. 8. pag. 639 :

Joannes Papa XXI. cum sibi vitæ spatium in annos plurimos extendi crederet, et hoc etiam coram aliis assereret, subito cum Camera nova, quam sibi Viterbii circa palatium construxerat, solus corruit, et inter lapides et ligna collisus sexto die post casum Sacramentis omnibus ecclesiasticis perceptis moritur.

Vita S. Pardulfi Abb. inter Acta SS. Benedict. sæc. 3. part. 1. pag. 575 :

Et ubicumque ipse Lantarius per suum comitatum vel in sua propria loca ambulabat, ipsum semper secum ambulare faciebat, et in sua Camera, ubi suus proprius fiebat lectus, semper eminus virum Dei requiescere faciebat.

Occurrit rursus hac notione in Vita B. Alcuini inter eadem Acta SS. Bened. sec. 4. part. 1. pag. 159. Confer Caminata. Apud monachos Bernardinos Cameram nuncupari cellam abbatis scribit S. Rosa de Viterbo Elucidarii tom. 1. pag. 238. voce Camara.