« »
 
[]« Candida » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 2, col. 084b. http://ducange.enc.sorbonne.fr/CANDIDA
CANDIDA, Vestis candida, alba. Passio SS. Perpetuæ et Felicitatis :
Qui erat vestitus distinctam Candidam, habens multiplices calliculas.
S. Hieronym. Epist. 6 :
Quæ pullam tunicam nigrosque calceolos Candidæ vestis et aurati socci depositione sumpsisti.
Idem Epist. 34 :
Et dedicatio ossium Martyris Candida tibi vestimenta reddiderit.
Adde Spartianum in Severo :
Prætor designatus a Marco est, non in Candida, sed in competitorum grege.
Id est, non inter candidatos Principis. Nam magistratuum quidam designabantur a Principe, seu commendabantur sine repulsa et ambitu designandi, ut loquitur Tacitus lib. 1. Annal. Vide Henric. Valesium ad 20. Ammiani pag. 184. Dicitur etiam
Candida, Editio ludorum, quæ fiebat a Magistratibus, Prætoribus scilicet et Questoribus candidatis proprio sumptu. S. Ambrosius Serm. 81 :
Præparemus nova et præclarissima munera, edamus primam Candidam in vestitu nudorum, secundam vero non minus nobilem, etc.
Acta S. Bonifacii Martyr. de Aglaë matrona Romana :
Hæc ergo ter Candidam egerat apud urbem Romam ex Præfectura.
[] Vetus Kalendar. Herwarti M. Decemb. 13. Kal. Jan. Munus Kandida. Quæ verba alii de munere, seu officio candidatorum, nescio an bene interpretantur. Passio SS. Seraphiæ et Sabinæ :
Filia Herodis Metellarii cujusdam, qui sub Vespasiano Augusto ter in urbe Roma Candidam confessionem dedit Romanis.
Ubi forte leg. editionem. Expungenda omnino est vox Confessionem, quam redundare monet Baluzius ; quæ præterea non legitur in aliis codicibus MSS. ut observant Bollandistæ tom. 6. Aug. pag. 501. col. 1.
© École des chartes.