1. CAREIUM. Charta Officialis Ambian. ann. 1243. in Tabulario S. Cornelii Compend. :

Recognoverunt se vendidisse pro 45. libris Paris. sibi persolutis Careium, in quo dicta Ecclesia eis teneri dicebatur, quod ipsi capiebant in grangia dictæ Ecclesiæ sita apud Visers a prima garba veniente ad eandem grangiam tempore messis usque ad ultimam trituratam, et partem vechiæ quam habebant in eadem grangia.

In alio ejusdem Chartæ exemplo recentiori legitur Conreium. Est autem Conreium, convivium vel quid simile, quod mensam spectet ; Carreium vero, vectura Domino debita. Neutra notio placet. Quare conjicio Careium hic idem esse quod Carion seu Carionem, i. decimam decimæ. Vide Cario.

2. CAREIUM, Mensis Careii, f. Quo carris exportari licet. Charta ann. 1317. in Reg. 56. Chartoph. reg. ch. 102 :

Liceat dictis priori et fratribus vendere dictum boscum in mense dumtaxat Julio sine tertio, dangerio et redibentia exinde solvendo ; verumtamen hujusmodi boscus quando scinditur illo mense, qui mensis Careii dicitur, fructificare non valet ulterius, nec utiliter vegetare.