CASBOVIS. Charta Gaufridi Guillelmi III. in nova Gall. Christ. Episcopi Aptensis ann. 1247. apud Sammarth. :

Serviat annuatim in festo B. Auspicii... unum Casbovis, scilicet 4. carteria valentia 50. solidos Willelmenses.

Infra :

Temperavimus canonem ante statutum in dictis brevibus civitatis Aptensis, et in castro S. Martini reducente in quartam partem unius Casbovis valentem 12. solidos Willelmenses pro brevibus antedictis faciendam in festo B. Auspicii.

Homagium Hugoni Episcopo Aptensi præstitum ann. 1310. ex Schedis Præsidis de Mazaugues :

Et solvere domino Episcopo et Ecclesiæ Aptensi annuatim in festo S. Auspitii medietatem unius Casti (vel Casli) bovis valentis 25. solidos Guillelmensium, vel æquivalentis monetæ.

Et nfra :

Offerant dictæ dominæ... 25. solidos coronatorum parvorum pro dicta medietate dicti Casti (vel Casli) bovis ;

id est, Bovis crassi seu pinguis, Gall. Bœuf gras, vel forte Carcasii bovis, seu Cadaveris bovis occisi. Vide Carcasium. Ut ut est voce Casbovis, Casti bovis, vel Casli bovis bovem integrum designari certo colligitur tum ex ipsa voce, licet corrupta, cum ex aliis locis Chartæ ann. 1247. una comparatis. Bertrandus Raybaudus de Simiana, qui propter breve episcopale de Bocaria, id est de tabernaria carnaria,

civitatis Aptensis debet unum Casbovis 50. sol. Willelm. in festo B. Auspicii, debet pariter de Castro B. Martini unum multonem vivum, qui valeat octo sol. Willelm. annuatim in vigilia B. Martini : qui tamen multo redigitur in agnum unum valentem tres sol. Willelm. quemadmodum Casbovis integer 50. solidorum redigitur in quartam partem valentem 12. solidos.

Hæc ex prædicta charta, solito fusius, quia in exponenda Casbovis voce hæsitarunt viri quidam eruditi. Vide Cassa 6.