CATECHUMENA, Catechumenia, Porticus Ecclesiæ superiores sic dictæ, non quod fuerint Catechumenorum stationes, vel locus ubi instrui solebant, ut censent Baronius ann. 656. n. 38. Wolphius, et Meursius : sed quod in iis mulieres sacras Liturgias auditu exciperent. Anastasius in Collectaneis pag. 180 :

Et ascenderunt ad eum in Catechumenium Ecclesiæ ipsius Monasterii.

Gregorius II. PP. Epist. 2. ad Leonem Isaurum in VII. Synodo :

Pontifices, si quis peccavit... eum in Ecclesiæ Diaconia et in Catechumena ablegant.

Eustochius in Vita S. Pelagiæ meretricis cap. 8 :

Quæ accipiens eum, ascendit in Catechumenum, eo quod et nos ibi maneremus. Κατηχούμενα

et ϰατηχουμένια has superiores porticus a Græcis appellari, pluribus ostendimus in Descriptione sanctæ Sophiæ cap. 38. Δίστεγον τῶν ϰατηχουμένων habet Crispinus in Vita sancti Parthenii Episcopi Lampsaceni cap. 2. n. 14. ubi Gentianus tabulatum, alii locum Catechumenorum vertunt. Sed δίστεγον, hoc loco, est δεύτερον ϰατηχούμενον, porticus Ecclesiæ superior, ita dicta Codino de S. Sophia. Δέξια μέρη τῶν ϰατηχουμενείων ædis Sophianæ, in Concil. VIII. Act. 1. Vide Glossar. med. Græcit. col. 621. et Append. col. 98.