CLIMA, ex Gr. ϰλίμα, inclinatio cœli, Vitruvio lib. 1. Septem autem climata, quæ sunt ϰατὰ θέσιν recensent antiqui Græciæ magistri. At Abulfeda Arabs climata ita distinguit ut aliud Clima verum unum e septem prædictis : Alterum, Clima cognitum, quæcumque regio, aut regnum plurimas provincias et tractus continens dicatur. Ab Arabibus igitur videntur Græci Byzantini regionibus ac provinciis Climatis nomen indidisse. Paulus Diacon. lib. 23. Hist. Misc. :

Ast Imperator rebelles cæsos et tonsos exilio damnavit, et apud Chersonam deportatos fore decrevit, et Climata illa sub custodia et munitione conservanda.

Anastasius in Hist. Eccl. pag. 137 :

Missus est in exilium apud Climata eremi.

Ubi Theophan.

Εἰς τὰ ϰλίματα ἐρήμου

. Sed ii a Græcis vocem hausere. Glossæ Basilic. : Οἱ βιϰάριοι τοῦ Ποντιϰοῦ, ἢ ἑτέρου τινὸς ὅλου ϰλίματος. Ita usurpant Palladius in Vita Chrysostomi pag. 23. Constantinus de Administ. Imper. cap. 1. Cantacuzenus lib. 1. cap. 4. initio, etc. Hinc ϰλιματάρχαι Climatum Præfecti, apud Simocattam lib. 3. cap. 9. lib. 4. cap. 7. et Constantinum Manassem pag. 139. et 168. edit. Meurs. Dudo lib. 3. de Morib. Normannor. :

Fama ilico per Franciæ Climata celeriter penetravit.

Ordericus Vital. lib. 3. pag. 491 :

Totam regionem in illo Climate pacificavit.

Egidius Parisiensis MS. lib. 1. Karolini :

.... Navarro in Climate genti

Pampilona situs et inexpugnabile castrum.