COLLYRIDA. Joan. de Janua :

Collyrida, dicitur a collum, et est panis tenuis, et quasi subcinericius : vel Collyrida est panis modicus et triangulus coctus, et frictus detersus.

Papias MS : Collirida, Subcinericius panis modicus panis triangulus. Mox subdit :

Colliridæ, panes quadrati de simila cum oleo sartagine frixi.

Lib. 2. Regum cap. 6.

Collyrida panis

. Gr. ϰολλύριδα ἄρτου. Hinc ϰολλυρίζειν cap. 13.

Opus pistorium facere

. Adde Leviticum cap. 7. et 8. Eadmerus de Similitudinibus S. Anselmi cap. 16 :

Cum nimis avide Collyridæ eduntur, quæ quasi nix candidæ videntur, sponteque manibus vel dentibus sic atteruntur, ut resonare audiantur.

Hugo Parisiensis de Institut. Novitiorum :

Alii semicorrosas crustas, et præmorsas Collyridas, cibariis iterando infigunt, et reliquias dentium suorum offas facturi in poculis dimergunt.

Alexander Poeta :

Collyridam panis quoddam genus esse memento.

Collyridarum etiam meminere Tertull. de Cultu fœm. 2. 7. et S. Augustinus de Genesi ad lit. 8. 5. Transactio inter Abbatem et Monachos Crassenses ann. 1351. ex Libro viridi fol. 53 :

Item debet dare dictus Dominus Abbas dicto Conventui in singulis festivitatibus... Pentecostes... triginta libras panis frumenti... necnon nectar et Colleridas sufficienter et semel dumtaxat quolibet anno, et non in quolibet dictorum festorum.

Et in Statutis S. Victoris ann. 1531 :

Item tenetur dare Pitantiarius in die Natalis Domini... tres Coleridas sive mensas pro quacumque pitantia.

Nescio an huc pertineant Colleridæ in Itinerario Gregorii XI. PP :

Hilariter Colleridas spargebant, velut rosarum flores.

Vide Hesych. in ϰολλύρα.