Comitiva, Idem quod Obsequium, Comitatus viæ, Italis Comitiva, Compagnia propriamente che accompagna per honorare ; Gallis, Suite. Bromptonus in Henrico II :

Filio suo mandavit ut sororem suam et Comitivam ejus reverenter susciperet.

Henricus Rebdorf. ann. 1360 :

Cum solemni Comitiva armatorum illuc venientibus.

Matthæus Paris ann. 1249 :

Pro recuperatione et defensione jurium nostrorum tam in cismarinis quam in transmarinis partibus ad quas nuper misimus Comitivam, etc.

Thwrocz. :

Perrexit cum bona Comitiva militum.

Chron. Trivetti apud Acher. tom. 8. Spicil. pag. 587. Edmundus Cantuar. Archiep.

in Comitiva sua fratres Prædicatores habebat continue.

Occurrit in Statutis Humberti Bellijoci apud eumdem Acher. tom. 9. pag. 241. in Maceriis Insulæ Barbaræ tom. 1. pag. 255. Anecd. Marten. tom. 3. col. 77. Vita B. Coletæ, etc. Adde Litteras Officialis Paris. ann. 1324. e Chartulario Montis Martyrum, ubi Comitiva sumitur pro pompa funebri, Gall. Convoi :

Item legavit unam caudam vini sufficienter ad potandum illis, qui sibi die obitus et die sepulturæ suæ facient Comitivam.

Comitivæ, etiam dictæ Prædatorum militarium Cohortes, quas vulgo Societates appellabant. Comitiva, Brigata, Compagnia di Gente, Italis. Bulla Urbani V. PP. apud Waddingum ann. 1364. num. 12 :

Impietas quorumdam virorum crudelium, quos sub titulo Comitivarum, seu Societatum immanitas congregavit.

Alia ann. 1365. n. 2 :

Litteras ipsas et processum, quem contra Comitivas impias fecimus vobis, per harum bajulum destinamus.

Bulla Gregorii II. apud eumd. ann. 1373. n. 8 :

Ne faciant Comitivas ... suis colligatis et fidelibus morituras.

Thomas Walsinghamus ann. 1366 :

Interpellaverunt auxilium Regis Angliæ contra magnas Comitivas quæ debacchabantur in Francia, etc.