COPATOR Monetæ, Qui scindit monetas prohibitas, ut nemo deinceps iis utatur. Præceptum Johannis Franc. Regis ann. 1353. apud de Lauriere tom. 2. Ordinat. pag. 519 :

Nostræ insuper intentionis existit, quod deinceps præfati fractores seu Copatores monetarum prædictarum hujusmodi officio nostro non possunt uti, imo sint penitus revocati, nisi in casu quo monetæ prohibitæ extra regnum portarentur, litteris in contrarium impetratis subrepticiis vel impetrandis non obstantibus quibuscumque.

Ibidem dicuntur Scisores monetarum. Aliud Præceptum ejusdem Regis ann. 1355. Ordinat. tom. 3. pag. 27 :

Item, nous avons osté et rappellé, ostons et rappellons tous Coupeurs de monnoyes ; mais toutes voyes nous pourverrons par bon conseil comment nulles autres monnoyes que les nostres n'ayent cours en nostre Royaume et que le billon ne soit porté hors de nostre Royaume.

Ibid. pag. 113. Litteris ann. 1356 :

Tollentur Copatores monetarum qui pocius dici possunt depredatores.

De iis monetarum Copatoribus, Scisoribus, vel potius Scissoribus sic continuator Chron. Guillelmi de Nangis ad ann. 1346. apud Acherium tom. 11. Spicil. pag. 803 :

Tunc etiam et deinceps antea superscindebantur floreni propter novas monetas, quæ noviter fiebant ; et super quos inveniebantur aliæ monetæ quam illæ, quæ erant noviter factæ, sine misericordia scindebantur, et adhuc illi cujus erant, tradebant salarium non voluntarium Scindentibus pro labore, et tunc oportebat tales pecunias tradere camsoribus cum damno non modicæ quantitatis.