CORRATEGARE, Corratejare, Officium corraterii exercere, res quavis ratione vendendas æstimare et emptoribus proponere. Stat. ann. 1272. inter Probat. tom. 1. Hist. nem. pag. 97. col. 2 :

Item statutum est, quod si corraterius vel corraterii, mandato venditorum, traxerint rem venalem ad inquantum, vel alio modo ipsam Corratejando, et dicti corraterii laboraverint mostrando emptoribus rem venalem, et postea venditor noluerit vendere et tradere dictam rem Corratejatam, etc.

Charta ann. 1307. in Reg. 48. Chartoph. reg. ch. 213 :

Petrus Felicis et Poncius Guirandelli corraterii publici civitatis Nemausensis jurati dixerunt et retulerunt dicto domino locumtenenti, et suo juramento se de mandato dictorum commissariorum Corratejasse et fecisse subhastari... prædictum hospitium.

Stat. ann. 1371. inter Probat. tom. 2. ejusd. Hist. Nem. pag. 309. col. 1 :

Quod dicti corraterii seu mediatores, et eorum quilibet teneatur bene et diligenter Corrategare et perquirere emptores quoscumque, quos cum diligentia reperire poterunt, pro rebus eis traditis ad vendendum.