CORUSCUS, Fulgetrum, Ἀστραπή ; Esclair, nostris. Plinius :

Fulgetrum prius cernitur, quam tonitrum auditur. Coruscare,

apud Apuleium de Mundo, Esclairer, ἀστραπτειν. Gloss. Lat. Gr. : Fulget, ἀστράπτει. Coruscatio apud Solinum, et Matth. Westmonast. ann. 1198. 1218. 1230. 1246. Ebrardus Bethuniensis in Græcismo :

Sol radiat, mucroque micat, fulgorque Coruscat,

Quum fulgor supra nos paret, tunc fulgurat æther.

Vetus Interpres Juvenalis Sat. 13. v. 223 :

Nam ex nimio flatu vel certamine ventorum nubes inter se conlisæ tonitrua et Coruscos faciunt, veluti saxa inter se collisa ignem faciunt.

Gregor. Magn. lib. 2. Dialog. cap. 15 :

Roma a gentibus non exterminabitur, sed tempestatibus, Coruscis, turbinibus, ac terræ motu fatigata, marcescet in semetipsa.

Cap. 33 :

Tunc vir Dei inter Coruscos et tonitruos atque ingentis pluviæ inundationem, etc.

Gregorius Turon. lib. de Mirac. S. Martini cap. 29 :

Factus est super illos splendor Corusco similis.

Fortunatus lib. 3. Poem. in Epistola ad Felicem Episc. :

Et soporantes oculos, quos mihi aperuistis tonitruo, clausistis Corusco.

Hugo Flaviniac. in Chron. pag. 245 :

Inter Coruscos et turbines tempestatis imminentis.

Occurrit præterea apud Bedam lib. 4. Hist. Angl. cap. 3. Petrum Damian. lib. 6. Epist. 32. extrema, Cæsarium lib. 2. Miracul. cap. 27. etc. Corusciferi laquearia cœli, apud Martian. Capellam.