1. CUMBA, Cymba, navis, seu potius navis species. Vide Isidor. Origin. lib. 19. cap. 1. sect. 25. cap. 2. sect. 1. Glossar. Arabico-Latinum : Lembus, navicula brevis, dicta et Caupulus, et Cumba, et Lintris. Papias : Cumba, navicula, locus navis. Gloss. Gr. Lat. : Σϰάφη, τὸ πλοιάριον, Alveum, Alveus, Cumba. Alibi : Ἀϰάτιον, Cumba. Gloss. Saxon. Ælfrici : Cumba, vel caupolus, etc. Lexicon. MS. Regium :

Κύμϐαι, πλοῖα περιφέρει, Ρωμαίοις.

Ugutio : Cumba et Cimba, ima pars navis et vicinior aquis, sic dicta, quod aquis incumbit, unde et ipsa navis, et præcipue parva dicitur. Festus Avienus in Descript. Oræ maritimæ :

... Cumbis turbidum late fretum

Et beluosi gurgitem Oceani secant.

Flodoardus lib. 14. Carm. 18 :

Sistere sic triduo cogens sine gurgite Cumbam.

Alibi :

Applicitas quæ littoribus propellere Cumbas

Insurgunt.

Utitur et Prudentius lib. Peristeph. Hym. 2. 25. Occurrit etiam in Notis Tyronis. Hinc forte Κομϐάριον, navigium majus, apud Constantin. Porph. in Basilio cap. 42 :

Τριάϰοντα πλοίων μεγίστον, ἅ Κομϐάρια λέγεται.

Cap. 43 :

Εἰϰοσί ϰομϐάρια.

Utitur etiam Leo Imp. in Tactic. cap. 18. § 140. (qui a Saracenis vocabulum accersit, dicto cap. 18.) et cap. 19. § 70. ut et Cedrenus pag. 580. 581. Edit. Reg. et Zonaras in Basilio. Κομπάριον idem Constantinus dixit lib. 2. de Themat. cap. 11. pag. 106. Gombarias vocat Andreas Dandulus in Chron. MS. ann. 992 : Naves, quas Veneti Gombarias nominant, contra Narentanos Sclavos misit. Vide Glossar. med. Græcit. et supra Caupulus.