2. CURIOSUS, Κουριωσσός, Palladio in Vita Chrysostomi pag. 15. Edit. Emerici Bigotii. Gloss. Basil. : Κουρίοσος, εἶδος ἀξιώματος. Sic autem appellabantur, qui delecti ex Memorialibus, atque etiam ex Agentibus in rebus, ab Imperatoribus, per singulas provincias, modo duo, modo singuli, annuum munus acturi mittebantur, qui et cursui publico invigilarent, ne videlicet citra evectionem quis eo uteretur, et omnia, quæ geri in Republica viderent, ad Principis notitiam deferrent. Unde recte Scaliger ad Manilii lib. 5. dixit, Curiosos idem munus obiisse, quod in Gallia Contrarotulatores dispositorum equorum, les Controlleurs des Postes. In Notitia Imperii occurrunt Curiosi cursus publici præsentalis, et Curiosi per omnes Provincias, sub dispositione Magistri Officiorum ; Curiosi litorum, in Novella Theod. et Valent. de Tribut. fiscal. Curiosorum fit etiam mentio apud Firmicum lib. 3. cap. 13. Tertullianum lib. de Fuga in persecut. Athanasium Apolog. 2. Suidam in Vita Chrysostomi, etc. qui cum multiplici nequitia et concussionibus infamarentur, sublati demum sunt a Juliano Imp. De his pluribus agit præterea titulus Codicis Theodos. de Curiosis, (6, 29.) et ibi Jacobus Gothofredus.