DISCRIMEN, Discriminale. Gloss. Lat. Gr. : Discrimen, ἀναϰτένισμα, διάϰριμα, ϰαὶ ϰίνδυνος, Discerniculum, discernendis seu dividendis ante frontem mulierum capillis idoneum. Glossar. Lat. Theotisc : Discriminalia, muliebris capitis ornamentum, quo crines discernunt. Joan. de Janua : Discriminalia dicuntur, quæ dividunt capillos per mediam frontem. Infra ex Isid. lib. 11. cap. 1 : Sunt proprie Discriminalia, quibus crines divisi religantur. Idem Isid. lib. 19. cap. 31 : Discriminalia capitis mulierum sunt vocata ex eo, quod caput auro discernant : nam discriminare, dividere dicitur. Isaias cap. 3 :

Et monilia, et armillas, et mitras et Discriminalia, et perischelides, etc.

Ubi Mamotrect. :

Discriminalia, quæ sunt ad distinguendum capillos, ne ad invicem intricentur.

Lex Bajwar. tit. 7. § 5 :

Si Discriminalia ejecerit de capite Wulworf dicunt, Baluz. habet, quod Walwrst dicunt, vel virgini libidinose crines de capite extraxerit, etc.

Acus crinalis, Apuleio. Martial. lib. 14. Epig. 24 :

Tenuia ne madidi violent bombycina crines,

  Figat acus tortas sustineatque comas.

S. Hieronymus in Isaiam cap. 3 :

Habent acus mulieres, quibus ornamentorum crinium compago retinetur, ne laxius fluant, et in sparsos dissipentur capillos. Discriminalis acus,

apud eumdem lib. 3. in Ruffinum cap. 11. Martian. Capel. l. 9. § 903 :

Crinalem spicum pharetris deprome cupido

  Libens capillum solvere.

Ubi spicum pro spica usurpatur. Vide Pricæum ad Apolog. Apuleii pag. 11.