1. DISPENSA, Expensi ratio, sumtus. Glossæ vett. Barthii : Impendium, Dispensa. Will. Brito in Vocabul. MS. : Dispensa, expensa. Eginhardus Epist. 13 :

Nam de Dispensa, quam in Aquis accepistis, nullam volo aliam retributionem, nisi amicitiam tuam.

Capitula Caroli M. lib. 4. cap. 73 :

De Dispensa Missorum nostrorum, etc.

Concilium Duziacense 1. part. 4. cap. 4 :

Noluit ire ad mansiones, quas sui homines præmissi acceperant, ad quas Dispensa sua adducta fuerat.

Adde Synodum Ticinensem ann. 855. Capitula Caroli C. tit. 5. ap. Tolosam ann. 844. cap. 3. 5. Capitulare de Villis cap. 24. Capitul. ann. 821. cap. 2. Catellum in Comitibus Tolosanis pag. 192. Fragment. ampliora Polypt. Sithiensis ap. Guerard. pag. 404. caput 22. inscriptum :

Brevis de substantia et censu et Dispensa, etc.

Ibid. pag. 405 :

De farina grossa ad Dispensam famulis et pauperibus, etc.

2. DISPENSA, Penaria, promptuarium, a Gallico Despense. Camera Dispensatoria, in Chronico sancti Trudonis lib. 10. pag. 470. Solarium ad Dispensandum, in Formul. fiscor. describend. ap. Pertz. Leg. tom. 1. pag. 178. lin. 37. Leges Canuti Reg. Angl. cap. 103 :

Sed suum horderium, quod dicere possumus Dispensam, et cistam suam... debet ipsa custodire.

Liber Ordinis S. Victoris Parisiens. MS. cap. 11 :

Sub manu Cellerarii est coquina, lardarium, Dispensa interior.

Jo. Brompton. ann. 1189 :

Radulfus Clericus de Dispensa Regis.

Bracton. lib. 3. Tract. 2. cap. 32. § 9 :

Habere debet uxor sub custodia sua claves Dispensæ suæ, et scrinii sui.

Cellerarius Dispensæ, in Capitulis General. S. Victoris Massil. MSS. ubi pluries occurrit vox Dispensa hac notione : verum alia paulo diversa, scilicet pro obsonio Monachi, usurpat Guido Discipl. Farfensis cap. 36. ubi sic :

Similiter pro illis, in quorum anniversario plenum Officium sit, tot Dispensas vel justitias recipiet, quæ constitutæ fuerint in loco.