EREMUS, Incultus, Erema terra, inculta :

... Immunis, rastroque intacta, nec ullis

Saucia vomeribus.

Heremps, in Consuetudine Solensi tit. 13. art. 1. 3. 4. Terme Herme, in Marchiensi art. 425. Burbonensi art. 331. Arvernensi cap. 28. art. 3. Gloss. Græc. Lat. Ἔρημος, Deserta. Lex 4. Cod. de Censib. lib. 11. tit. 49 :

Omne territorium censeatur, quoties defectorum levamen exposcitur, ut sterilia atque jejuna his, quæ culta vel opima sunt, compensentur.

Ubi Cujacius notat quosdam Cod. pro jejuna habere Erema, et Græcos hæc verba sic extulisse, τὰ ἔρημα μετὰ τῶν εὐθαλῶν συμψηφίζονται. Michaël del Molino in Repertorio fororum Aragon. in v. Ganatum :

Si illa hæreditas est Herema, et talis quæ non possit rigari nisi de cælo, etc.

Præceptum Caroli M. pro Hispanis ann. 812 :

Erema loca sibi ad laborandum porpriserunt.

Præceptum Ludovici Pii ann. 821. Marcæ Hisp. col. 767 :

Cellulas quas ipsi ab Eremo construxerunt.

Præceptum Carlomanni Regis ann. 881 :

Terras quas ex Eremo traxerunt, quiete possideant.

Charta Sanctii Navarræ Regis apud Oyhenartum pag. 99 :

Cum omnibus terminis et pertinentiis... cum Eremo et populatu.

Alia Petri Episcopi Aginnensis ann. 1246 :

Eundem montem cum suis pertinentiis licet desertum, nemorosum, et Eremum, ad nostrum dominium ratione feudi pertinere dicentis.

Alia Willelmi Comit. Tolosæ ann. 1080 :

Ipsum boscum cum omnibus terminiis, affrontationibus, exiis, et regressis suis, omnia et in omnibus, cultum et Eremum, sine reservatione.

Vita S. Judoci Presbyteri n. 12. inter Acta SS. Benedict. sæc. 2. pag. 569 :

Posthæc vero præcepit Haymo, ut incideretur Eremus, qui erat in gyro densissimus, quatenus locus ille habitationem Dei famulo redderet aptam.

Spinetum hic esse intelligendum ex superioribus liquet. Adrevaldus de Translat. S. Benedicti cap. 1.

Ita ut in Eremi vastitatem loca prius desiderabilia conversa viderentur

. Cap. 2 :

Qui locus ad Eremum redactus cœpit esse ferarum... habitatio. Eremæ hæreditates,

in Testamento Jacobi Regis Aragon. ann. 1272. Vide Foros Beneharn. rub. de Herbages art. 13.