1. FAIA, Fagus, seu arbor glandifera, vel glandem fageam ferens. Lex Longob. lib. 1. tit. 19. § 8 :

Si quis roborem, aut quercum, seu cerrum, quod est modo laiscum, aut glandem, quod est Faia,... inciderit.

Ubi Leges Rotharis Regis tit. 101. § 62. pro modo laiscum, habet medula ischat. Roth. 305. Walterus legit :

Si quis robur, aut cerrum seu quercum, quæ est modola, hisclum aut glandem, quod est Faia ;

al. Fagia. Tabular. S. Eparchii Inculism. fol. 4 :

Et de silva nostra, quæ vulgo appellatur Faia præpositalis.

Silva fagis consita. Charta Guill. Bartholomæi pro monast. S. Juniani apud Stephanot. tom. 3. Antiquit. Pictav. MSS. pag. 729 :

Partem meam, quam habebam in alodis de Mauseas et in Faia Ricardi, Deo et S. Juniano dono jure perpetuo.

Vide Fagia 1. et Fagina 2.

2. FAIA. Vetus Membrana in Sanctuario Capuano pag. 529 :

In vigilia revelationis S. Stephani, infra scriptæ Ecclesiæ venire debent cum Faiis ad Ecclesiam Capuanam, etc.

Ubi Michael Monachus :

Hic Faia seu Faius est machina hujusmodi formæ : pertica alta et gracilis seu arundo intra 3. circulos æque distantes immittitur : baculi et circuli adornantur : eminet signum Crucis in vertice, et a pede Crucis, bracteæ seu vittæ papyraceæ tres vel 4. coloribus et incisuris pulcræ deorsum pendent, circulis alligatæ, ne moveantur. Quare Faius seu Faia rotundæ metæ seu turris formam repræsentat.

Belle hæc quidem, at unde vocis origo ? hic hæret Monachus. Forte, inquit, ab initio ejusmodi machina dicta Pharus seu Phara, postea corrupta voce Faius et Faia. Forte denique per Faia intelliguntur rami fagorum, quos Faias Longobardi appellabant, quos eæ Ecclesiæ deferrent. Quid si legendum baiis, id est, palmarum ramis ? nam præterquam quod ita appellabantur a Græcis nuperis, constat Stephanum Protomartyrem cum palma in manu vulgo depingi in signum martyrii.

3. FAIA, Alia notione. Vetus Charta apud Dominicum lib. de Prærog. allod. sub finem :

Illa vinea de illa Faia super via Rigaldo fratri Bosoni dimitto.

Forte posset et hic intelligi Faia, Silva fagis consita, ita ut Vinea de Faia sit vinea prope silvam fagineam. Faia vel Faya Dumbensibus est Ovis, sed hæc nihil ad præcedentia.