FIBULATORIUM, a Fibula, qua vestis subligatur, vox deducta, unde quibusdam pro ipsa fibula sumitur ; et certe Gloss. Gr. Lat. huic expositioni favet : Πόρπη, ὐποϰοριστιϰῶς, Fibulatorium. Ita ut fuerit parva fibula. Ugutio : A fibula, Fibulatorium, illud, quod apponitur mantello, per quod mittuntur fibulæ, ne dissipetur mantellum. Quo loco Joannes de Janua habet Fibularium. Constitutiones Catalaniæ MSS. :

Nec portent aurum vel argentum,.... nec Affibilas cum auro vel argento.

Locum integrum vide in Laqueatæ vestes. Anastasius in Gregor. III. qui id inter sacra ministeria reponit pag. 72 :

Contulit dona diversarum specierum,.... amulas superauratas paria 2. pendentes, Fibulatoria numero 5.

Idem in Leone IV. pag. 197 :

Cantharam exauratam 1. baucas exauratas 3. Fibulatoria majora et minora 5.

Leo Ost. lib. 1. cap. 19 :

Listam unam auream cum margaritis, et Fibulatorium nihilominus aureum, etc.

Fibulas aureas pro donariis oblatas Ecclesiis habet etiam Anonymus de Miraculis S. Remacli cap. 11. et 24. apud Mabillonium. Ejusmodi Fibulatoria, Firmacula vocabant nostri, (vulgo Fermail) quibus scilicet vestes clauderentur et astringerentur. Froissart. 2. vol. cap. 154 :

Et si eut pour le prix un Fermail à pierres precieuses, que Madame de Bourgogne prit en sa poitrine.

De fibulis aureis et gemmatis copiose egerunt Petr. Faber lib. 1. Semestr. cap. 16. Chiffletius in Anastasi Chilperici cap. 16. et Salmasius ad Tertullian. de Pallio pag. 62. 63. nos etiam quædam in Notis ad Joinvillam pag. 48. Vide Fermeilletum.