FORFEX, Forpex. Gloss. MS. Regium : Forceps, Fabri, qui corrupte Forfices dicuntur. Ex quo emendari possunt Glossæ Isidori. Ebrardus Bethuniensis :

Forfice fila, pilum cape Forpice, Forcipe ferrum.

Ita etiam auctor Mamotrecti ad cap. 7. Isaiæ. Hocce discrimen non observant Gesta Regum Franc. cap. 24 :

Illi statim remiserunt Arcadium ad Reginam, dicentes : Hic sunt Forfices, et ecce gladius : sic mandant filii tui ; si vis eos tondere, aut gladio perimere, etc.

Ubi Gregor. Turon. lib. 3. cap. 18. habet Forcipes. Concilium Pictavense ann. 1100. cap. 2 :

Ut nemo in faciendis coronis (Clericorum) Forpices vel manutergia exigat.

Archithrenius lib. 3. cap. 3 :

Forfice tonsa pilos, etc.

Idem lib. 2. cap. 3 :

Prodigus in latum, nec castigatus avaro

Forpice, procedit tunicæ discursus, etc.

Papias : Forpices, Tenaces a pilo : tonsorum enim sunt. S. Willelmi Constitut. Hirsaug. lib. 1. cap. 2 :

Hoc ordine eadem tonsura agitur. Sacerdoti Missam celebraturo adest Armarius cum libro, Magister novitiorum cum Forpice et linteo, etc.

Vide Octav. Ferrarium in Forbice et supra Forceps.