FRAMEA, a ferrum, quasi ferrea ; Gladius ex utraque parte acutus, idem est et spata et romphea. Johannes de Janua. Ita Isidor. lib. 10. Orig. cap. 6. aliique Glossographi. Gloss. Lat. Gall. Sangerm. : Framea, Glaives agus d'une part et d'autre, espée. His consentit versio lxx. Interpretum Psalm. 34. quæ ἔϰχεον ῥομφαίαν, reddit Effunde Frameam. At, si Tacito fides, Framea non gladius, sed hasta fuit, quam ille ubi de Moribus German. sic describit :

Hastas, vel, ipsorum vocabulo, Frameas gerunt, angusto et brevi ferro, sed ita acri et ad usum habili, ut eodem telo, prout ratio poscit, vel cominus vel eminus pugnent.

Hinc etiam patet frustra hujus vocis etymon a Latio quæsiisse Glossatores, quam Germanicæ originis esse liquido docet Tacitus. Diverberatum cadaver Frameis reperiunt, in Ademar. Histor. libr. 3. cap. 22. ubi alius cod. confossum gladiis corpus reppererunt.