1. FRIXORIUM, Patella, vel ferrum, super quo quid coquitur, Ugutioni. Gloss. Lat. Gall. Sangerman. : Frixorium, Frixoir, c'est paelle à fritture faire. Papias : Cremium, Frixorium, a cremando, vel quod est aridum. Macrobius de differ. et societ. Græci Latinique verbi :

Frigo vero, frixi, a tertia, unde frixum, Frixorium, id est, calefactorium. M.

Robertus de Sorbona in Serm. ad Theologos de Conscientia :

Tantum torquet justum iniquitas aliena, quantum recedit a sua : peccata enim proximorum, Frixoria sunt justorum.

Vita Gregorii VII. Papæ apud Murator. tom. 3. pag. 319. col. 2 :

Adhæc zelotes Dei alto gemitu suspirans et Frixorium cordis sui super illis qui corrupti erant dedignativo gestu significans ait ad corruptorem : Credis o Episcope, etc.

Chron. Cremon. apud eumdem Murator. tom. 7. col. 635 :

Eodem tempore Imp. Fedrichus in odium Cremonensium Cremam reædificavit, non solum Cremonensium gentium, sed aliarum etiam Frixorium Longobardiæ.

Hæc metaphorice ; verum absque tropo vocem eamdem usurpat Boncompagnus de Obsidione Anconæ cap. xi. etc. Frixoriis usos fuisse Paganos ad torquendos Christi Martyres discimus ex Actis S. Cononis Maii tom. 7. pag. 7 :

Domitianus dixit : Succendite Frixorium, et mittite eos ibidem.

Vide Frixura Zeli.