GUMPHUS, Gunfus, Gomphus, Conglutinatio, concatenatio. Papiæ ; Junctura vel vinculum aliquorum corporum, Ugutioni, et Willelmo Britoni in Vocabulario. Acta S. Sebastiani n. 88 :

In cloaca illa, quæ est juxta Circum, invenies corpus meum, pendens in Gompho.

Gumfus, habet Ordericus lib. 7. pag. 643 :

Quid referam de Sebastiano, quem sagittatum in cloaca suspenderunt Gumfo ?

Acta S. Thyrsi n. 21 :

Quia ipsa (simulacra) magis reguntur Gomphis ferreis, et plumbo, et saxo.

Gesta consulum Andeg. cap. 3. num. 26 :

Cum ostio fusili, quod Gunfis et vertevellis et quatuor clavibus firmabatur.

Guibertus lib. 3. de Vita sua cap. 11 :

At modo residui proceres profugarum usque ad Gonfos, seras, et pessulos omni substantia atque utensilibus addemnabant.

Ita emendandus hic locus, pro ad confosceras. Magister Ægidius Corboliensis lib. de Pulsibus :

Atropos excludit Lachesim, vitalia rumpit

Stamina, dissolvit Gumphos, vitamque relegat.

Joannes de Garlandia in Synonymis :

Est constructa polis, radius, cantus, rota Gumphis.

Alanus in Anticlaudiano lib. 7. cap. 1 :

Junctura tenui, Gumphis subtilibus aptat.

Idem de Incarnatione :

Quæ sint vincla, quæ juncturæ,

  Qui Gumphi, quæ unio.

Hinc nostris vox, Gond, orta. Græcis γόμφος est clavus. Gloss. vet. Lat. German. et Gemma Gemmarum : Gumphus Germ. ein Huffnagel (clavus quo ferrea sola equo suppingitur) vel uncus, vel est quilibet clavus. Adel. Vide Vertibella.