HERGEWEDE, Militaris supellectilis præstatio domino exhibenda post obitum vassalli, idem quod Herezelda et Heriotum. Charta Reinaldi archiep. Colon. ann. 1166. inter Probat. tom. 2. Annal. Præmonstr. col. 76 :

Hoc tamen ipsi tantum comitissæ permisimus, ut si, quod vulgo dicitur Hergewede, ipsa vivente de ministerialibus Merensibus vacaverit, ipsa id ex nostro mandato recipiat.

Alia ann. 1231. tom. 1. Hist. Trevir. Joan. Nic. ab Hontheim pag. 709. col. 2 :

Nec idem (hæres) in receptione dicti feodi aliquo jure, quod vulgariter Hergewede dicitur, nobis vel nostro servire tenebitur successori.

Vide Hergeweth.