HUSTINGUS, Glossarium mediae et infimae latinitatis, Du Cange et al.

« Hustingus » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 4, col. 268b. http://ducange.enc.sorbonne.fr/HUSTINGUS

HUSTINGUS, Curia ita dicta non modo in urbe Londoniensi ; sed et in Wintoniensi. Lincolniensi, Eboracensi, et apud Shipwey insula in borealibus Cantii partibus, ex hus, domus, et ðing, causa, quasi domus causarum, vel ubi causæ agitantur. Ita censet Spelman. At Somnerus Hustingum, dictum contendit, quasi hystðing, id est, supremum judicium, ab highest, vel ut antiquitus scriptum, hyhsta, i. supremum, et ðing, judicium. Janus Dolmerus ad Jus aulicum Norvegicum vetus pag. 503. Huusting, Prætorium vertit, vocemque effictam ait ab Huus, domus, et Ting, forum ; quasi domesticum forum.

◊ De Hustingo Londoniensi, ita Leges Edw. Confess. cap. 25 :

Debet etiam in London, quæ caput est regni et legum, semper Curia domini Regis singulis septimanis die Lunæ Hustingis sedere et teneri.

Charta Henrici I. Regis Angl. pro Londoniensibus :

Et amplius non sit Miskenninga in Hustenge, neque in falkesmote, neque in aliis placitis infra civitatem, et Husting sedeat semel in hebdomada, videlicet die Lunæ.

Charta apud Madox Formul. Angl. pag. 200 :

In pleno Hustengo Londoniæ de Communibus placitis tento die Lunæ proximo post festum S. Martini, anno regni Regis Edwardi III. post conquestum Angliæ 37.

Hustingi Londoniensis meminit præterea Matth. Paris ann. 1196. Bractonus lib. 3. tract. 2. cap. 13. § 9. Will. Thorn. ann. 1395. Gul. Prynneus in Libert. Angl. tom. 3. pag. 484. etc. aliarum etiam memoratarum urbium, Fleta lib. 2. cap. 2. § 13. cap. 54. § 1. 2. etc. Watsius ait, hodie Hustingum Londoniensem Guild-hall nuncupari, et in eo Commune urbis de rebus arduis consultare consuevisse : ibidemque etiam nobile haberi tribunal, ubi civium lites causæque vitatis inutilibus fori formulis dirimuntur.